Asluub. [gabay].

Abwaanka: Maxamed Cabdiqaadir Daauud [Stanza].

Gabayga:   Asluub.

Taariikhda: 2/2/2006.

 

F.G: Gabaygan la magacbaxay asluub wuxuu la talinayaa ninka la yiraahda Khadar Keyse Maxamuud   oo si shixood-darro ah ugu gafay abwaanka weynee Soomaaliyeed, Maxamuud Cabdullaahi Ciise [Singub]. Waa ciil iyo caloolyoow inuu nin abwaannimo sheeganaya sidaas u dhaqmaa dhabti. Gabaygan wuxuu kaloo la hadlayaa oo uu wanaagga ku boorrinayaa suugaanyahannada iyo suxufiyiinta ninkaas ku fikirka ah ee caadeystay shaqsi-dilka iyo afxummeynta aqoonyahannada iyo abwaannada Soomaaliyeed kuwa ugu qiimaha badan uguna Soomaalnimada jecel, ayagoon dhalliil muuqata oo cad miiska golayaasha gorfeynta howlaha gurracan marna soo dhigeynin balse qoraaladooda laga dheehan karaya qof-necbeysi iyo qardoofo aan qiimo laheyn aadna u qaawan. Gabaygu caay waa ka hufanyahay balse waa liishaan, talo iyo tusaale miiggan oo mug iyo cuf leh.

 

Khadarow ilduuftaye, war waad alaladeysaaye.

Halka laga agloolaan ku bari, gabay asluubtiiye.

Waxaan ina-abtoow kugu anqarin, eray wanaaggiiye.

Ilaahey hadduu kugu anfoco, aad bal ugu fiirso.

 

Nin ogsoon siduu iilku yahay, balo ma oogeene.

Aakhiro qabiil kuma anfaco, nin iyo aashiiye.

Mar haddaad isyaannimo is-badi, ama abwaan guuna.

Ublikeynta waa lagu gubtaa, waa asqaran jaane.

 

Nimanyahow afmaal gabidhacaa, waa ibtilo weyne.

Agab weeyo maansada war waa, ubaxa deyreede.

Uruurshaa wanaajuu rabtaa, alifka suugaane.

Aashaawad sow kuma wacneyn, inaad ilaaleyso?

 

Absammiyo Marreexaan dhammaan, ururta Daaroodka.

Isaaq iyo intey ehel yihiin, uunka Gadabiirsi.

Abgaal iyo ideylkii Hawiye, Noo akhribo guude.

Aadaas kuwaa lagu suntiyey, unug hal weeyaane.

 

Soomaali idilkeed abtoow, waa ilma-adeere.

Astaan lagu hirtaan leennihiyo, udub dhaxtaalkiiye.

Bulshadeenna oon bey qabtaa, uurxumna muushe.

Ma abeydin baa tahay maxaad taa, uga ilduuftay?

 

Daarood Ismaaciil maxaad, ugu agmeereysan?

Afweyniyo wuxuu aafo dhigay, idil na saameeye.

Amba eelka waan kula qabiyo, uumi iyo shiishe.

Maxaad eedda ani iigu godi, waa aqlila'aane?

 

Idaajaa maxaad u afxumeyn, waa Adiib qarane?

Yamyam maxaad unkaha, ey u oran waa aftahan weyne?

Singub maxaad agnaannimo u bidi, waa abwaan qarane?

Maxaad Cali Khaliif ugu ab-abi, waa aqoonyahane?

 

Dhoodaan maxaad ugu afnaqi, waa ileys baxaye?

Anaaniyad maxaad ugu ikrimi, waa irdhiyo yaabe?

Nin abwaan la moodaa jiroo, aafo fidiyaaye.

Afmaal lagu khasaaraa batiyo, eed-kobciyayaale!

 

Ishkin weeyo maansada af-wacan, waa irdhaban geele.

Aqoon iyo garaad bey rabtaa, loo arrimiyaaye.

Afar-foollahaan garan kareyn, yoolka adabeede.

Aqli-guran ilaaq-liidataa, adhaxda goysaaye.

 

Arba iyo atoor laaqimaa, oorshay dunidiiye.

Abris iyo af-leeb baa kiciyo, kheyr ambiyayaale.

Abab iyo abwaan-qaran waqood, aad u kala dheere.

Ishiqaadan doontide, war waad ibitiqeysaaye.

 

Isaaq iyo Ogaadeen haddaad, iin isugu dhiibto.

Arab iyo haddii reer-Isaaq, laysku aaneysto.

Agah! Goorta ay wada dhahaan, waa ilkacastiiye.

Asalkiyo inuu dhiiggu quban, sow ma ogid jaalle?

 

Abraahiina eebo-cadyadii, olol-mawaabshaane.

Waa raggi Amxaarada anfiyey, ee unuunjaraye.

Aar nimaan aqoon baa adeer, adhi ka waabshaaye.

Abeesaan waryaa daa ku idhi, ood ku oraddaaye!

 

Haddii oogta-waabari ideyl, laysku agabqaado.

Ninba aaladdiisiyo haddii, buunka la afuufo.

Haddii uu afdhiigluhu onkodo, oo ragna asiibo.

Inuu meydku ayaxaa ka badan, sow ma ogid jaalle?

 

Ummaddeenna oon kala eryaa, waa indhala'aane.

Nabad inaan abuurnaa ka roon, colaan aloosnaaye.

Waa aragtidaan jaalle qabo, kuna ogeysiine.

Dib u eeg tixdaad aawishiyo, gabayga aafeysan!

 

Aaran iyo abaar ina-abtoow, kala ilwaad roone.

Agan ubaxa buuxshaa ka wacan, uuro iyo boore.

Uskagleey arraajaa u daran, dumar abuurkiiye.

Haddii aad midnimo aynabtaa, adiyo aashaa dhe.

 

Anshax-xumada beentaa ka daran, hadal abwaaneede.

Ititibinta waanadu ka weyn, mala'awaalkaase.

Dhillowyahanka oogada ku yaal, waa alloowsahale.

Ififaaladaan kuu sawiray, ku intifaac jaalle.

 

Gudcur kugu afuray waa ibtilo, dayax-aguuggaase.

Sharaf kaa idlaataa ka dhigan, duluc ammaahaase.

Waxaad aawileysiyo waxaan, anigu eegaayo.

Waa dirir arooryiyo cidhjiidh, kala aflaaqeene.

 

Inooseen dambiilaba ma aha, caalamku ogsoone.

Abuukaate waa kuu na yidhi, aragtidiisiiye.

Aytoloshku waa lagu ogaa, waa utuna doone.

Waanadu abuurkaa ebyoo, kana itaal roone.

 

Aqli-naaqusnimadaa wax dheer, oododhacameede.

Afku-ceeblayaal waan necbahay, abur-cantuuggaase.

Abwaannimoy Allaha kuu raxmada, iilka lagu geeye.

Inaan aamusaa ila habboon, gabayga awdaaye!

 

Ehelkoo colloobiyo Ableey, laysku uurgooyo.

Asaay-qaad aroos lagu baddalo, waa umula-dooxe.

Anaa adag anaa aarsan bey, nimanki eedeene.

Adiguna isheedaad leedahay, uunku kula yaabye.

 

Birta aad afeysiyo waxaad, balo aglooleysa.

Af-libaax inaad gali waaba, la arkaaye.

Afeef-hore markii la askumaa, lagu adkeystaaye.

Alloow nabadda iil yaan ku ridin, agab xariireede!

 

'Aabbaha suugaanta'