Hooyo Soomaaliyeed oo lagu xukumay toban sannadood.

Maryan Ismaaciil Maxamuud oo ah hooyo Soomaaliyeed oo korsata shan carruura oo aqooma ah ayaa 22/12/2005, lagu xukumay toban sano oo xarig ah.  Maryan waxaa lagu qabtay qaad, kaddib markuu nin Soomaali ah oo qaad wata ugu yimid gurigeeda oo ku yaallay xaafadda Deem ee magaalada Khartuum. Booliska oo ninkaas ugaaranayay  ayaana gacanta ku dhigay hooyadan Soomaalida ah; sidaasi waxaa ii sheegtay Hodan Iimaan Warsame oo ay Maryan xigto yihiin kuna nool xaafadda Inqaas ee isla magaaladan, islamarkaana arrimaheeda xog miiggan ka haysa. Maraan wax ka weydiiyay bal in ay Maryan qaadka iyada iibineysay Hodan gaashaanka ayey ku dhufatay, laakiin warar waxaa jira tibaaxaya in ay Maryan qaadka iibin jirtay kana soo saari jirtay qutulyoomka caruurteeda oo dhammaantood ardey ka ah dugsiyada hoose dhexe iyo sare. Waloow ay wali ii suurtagelin inaan Maryan fool-ka-fool ula kulma, haddana Hodan waxey ii xaqiijisay in ciyaalka Maryan gurigii ay daganaayeen maanta laga saaray kaddib markey gaadhay xilligi lacagta guriga la bixin jiray taasoo culeyskeeda leh. Hooyadan Soomaaliyeed waxey dalka Suudaan ku nooleyd muddo dhan laba iyo toban sanadood, waxeyna haysataa caddeyn qoxootinimo laakiin UNHCR wax sidaas ah oo caawimaad ah kama hesha. Waxey Hodan ii caddeysay in ay muddo dhawr maalmood ah Maryan cuntada iyo cabbitaanka ka  soomantahay, waxey intaa ku dartay in safaaradda Soomaaliya hadda arrinta faraha kula jirta. Waxey kalooy Hodan ii sheegtay inuu jira abuukaate Maryan u doodayay oo lacag 1000 doollara u baahan. Maraan weydiiyey in howsha Maryan UNHCR la gaarsiiyey "Maya", ayey Hodan iigu jawaabtay.  Waxey Hodan ka codsatay qof kasta oo Soomaali ah oo dal iyo dibadba caawin karaya Hooyada Dhibban inuu gacan u fidiya hiil iyo hooba waa sidey tidhiye. Shilalka noocan oo kale ah oo kuwa salka ku haya dhigaalkii laga dhaxlay qaran-jabka Soomaaliya xangullaha jaray ee xurmadii dadka xididda-siibay xasna ku tuuray.

 

Stanza, wariyaha www.somaliwide.net Khartoum.