Bristol.UK: Masuuliyiin
uu hor kacayay Gudoomiyaha Beelaha Gabooye ee Qaarada Yurub iyo
Waqooyiga Ameerika Mudane Maxamed Ciise Caabi oo ku magac dheer
Saaqa
ayaa 04-09-06 kulan gaar ah la yeeshay Gudoomiyaha Xisbiga Qaranka Eng.
Faysal Cali Waraabe oo imika ku sugan magaalada London ee dalkan
Britain.
Kulankani waxaa si weyn
loogu lafo guray sidii loo eegi lahaa waxna looga qaban lahaa sidii
Beeshe Gabooye ee Somaliland ay u heli lahayd kaalinta ay ku lahayd
hoggaanka dalka iyo qaybsiga khayraadka dalka oo si siman loogu sooro
bulsho weynta Somaliland iyada oo aan loo kala eegin qabyaalad iyo nin
jeclaysi toona.
Mudane Saaqa waxa kale
oo uu sheegay in sidoo kale uu aad uga rajo xun yahay in
Beeshu ay wax ka hesho hadii la qabto doorashada Golaha Guurtida,
waxaana uu ugu Baaqay Saddexda Xisbi Qaran ee UDUB, UCID iyo KULMIYE iyo
Golayaasha Guurtida iyo Baarlamaankuba in ay si dhakhso ah u eegaan
arrintan, si Beelaha Gabooye ay u helaan xaqa ay u leeyihiin inay ka mid
noqdaan Golayaasha Qaranka ee Baarlamaanka, Guurtida iyo kan Dawladaha
Hoose.
Masuuliyiinta Beelaha
Gabooye waxa kale oo ay ugu baaqeen Bulshada iyo Xukuumada Somaliland
inay wax ka qabtaan dhinacyada waxbarsho, iyo dhaqaale ee Beesha haysata
sidoo kalena in loo hawl galo sidii loola dagaalami lahaa loona cidhib
tiri lahaa cunsuriyada iyo gooni sooca jahliga ku dhisan ee Beeshan
Gabooye lagu hayay boqolaalkii sanadood ee aynu soo dhaafnay.
Gudoomiyaha Xisbiga
UCID Eng. Faysal Cali Waraabe ayaa dhiniciisa waxa uu ballan qaaday in
Xisbigiisu uu il gaar ah ku fiirin doono Beelahan Gabooye oo uu ku
amaanay Dulqaad, Samir iyo Geesinimo ay ugu adkaysteen culaysyada faraha
badan ee beeshan soo waajahay boqolaalkii sanadood ee tagay, waxaana uu
Mudane Faysan Ballan qaaday in Xisbigiisu uu kaalin muhiim ah ka qaadan
sidii beeshu ay xaqeeda u heli lahayd.
Hadaba iyada oo aynu ka
warqabano cunsuriyada iyo gooni-sooca iyo duudsiga beeshan Gabooye lagu
hayay sanadaha badan waxaa Jariirada Somali Voice ay ugu Baaqaysaa
Xukuumada Somaliland inay Magacawdo Gudi Heer Qaran ah oo ka kooban
Xukuumada, Baarlamaanka iyo Guurtida si ay u baadhaan dhibaatooyinka
kala duwan ee haysta beeshan iyo sida ugu haboon uguna dhakhsaha badan
ee Beelaha Gabooye ay u heli lahaayeen Xaqa ay u leeyihiin ka qaybgalka
Xilalka Hogaanada Qaranka, iyo gaar ahaan sida ay suurto gal u tahay in
loo sameeyo tiro cayiman oo aan tartan galin oo Beesha Gabooye ay ku
yeelato golayaasha deegaanada, baarlamaanka iyo guurtida iyaga oo aan
luminayn xaqooda dastuuriga ah ee ah inay wax doortaan lana doorto,
sidoo kale Gudigaasi Heer Qaran waa inay hubiyaan in Wasaarad kasta iyo
Hay,ad kasta oo dawladeed ay hirgaliso oo ay shaqaaleeyso xubno kasoo
jeeda Beeshan si kor loogu soo qaado niyada iyo kalsoonida bulshadan
boqolaalka sanadood la takoorayay, dhinaca kale aqoonyahanka,
culimaa'udiinka, ururrada dhalinyarada, ururrada haweenka iyo laamaha
warbaahinta ee kala duwan ayaa iyaguna looga baahan yahay inay
bilaabaan wacyi galin balaadhan oo bulshada lagu dareensiinayo sidoo loo
soo afjari lahaa cunsuriyadan.
Mudane
Saaqa oo ka hadlayay kulankan ayuu waxa uu tilmaamay in aanay Beesha
Gabooye ka faaiidin doorashooyinkii Baarlamaanka iyo kuwii dawladaha
hoose ee dhawaan dalka ka hirgalay, waxaana uu sheegay inay wax laga
naxo tahay in Beelaha Gabooye ee Somaliland aanay Xubin qudhi uga soo
bixin doorashadii Baarlamaanka oo aanay maanta Beesho xubin qudha ku
lahayn Baarlamaanka Cusub ee Somaliland, sidoo kale waxa uu sheegay in
iyana doorashooyinkii dawladaha hoose ee dalka ka dhacay sanadkii 2002
aanay beeshu waxba ka helin, isaga oo sheegay in magaalada Hargeysa oo
Beelaha Gabooye ay ugu badan yihiin aanay xubin qudha ku lahayn Golaha
Deegaanka ee Hargeysa oo ka kooban 25 xubnood.
C/rahman
Eeley Wareysigii
uu kasoo qaadey
Afhayenka
Beesha Gabooye ee
Qaarada urub
iyo America.
Email
: