---- Welcome to Dulmane.com Daily news from Somalia!

Beelaha Jareer Weyne qaab Dhoola-tus ahaan miyaa Mashruucyadda Qaar loogu fuliyaa?....Qisaastuna ma ayagu un bay qabataa.!!!!!!..?

Qisaasta waa nolol, haddii lagu dhaqmana waxay horseedaa ammaan, xasiloomi iyo nabad, sida uu ALLE ku cadeeyay Qur'aankiisa Kariimka ah, waxaana u aragnay si baraatiko ah, marka loo eego xaalada dhabta ah ee ka jirta Soomaaliya, iyadoo maxkamado islaami ah ay muddooyinkaan ka dhaqan galayeen Soomaaliya, mar marna bur burayeen, waxayna maxkamad waliba salka ku haysaa qabiil, oo waxaa si gaar ah u furta dadka ka soo jeeda beelaha isla qobka wayn.

Qisaasta lagu fuliyo dadka, waxay mararka qarkood noqon kartaa xad gudub iyo xitaa masiibo wayn oo ummada loo halaago, sida uu rasuulka {SWC} uu ku yiri Xadiis ka hadlaya Qisaasta, oo ay ku caddeyd; in dadkii hore loo halaagay iyagoo qisaasta ama xadka ku oogi jiray dadka masaakiinta ah, ee taagta daran, halka kuwa laf waynta ka soo jeeda (Allaa awood lehe) markaas ayuu Rasuulka (SWC)ku dhaartay inuu gabadhiisaba hanoqotee xadka ku oogi doono, haddii ay xad ama dembi kale gasho.

Xaalada Soomaaliya waa la wada ogsoon yahay, siiba magaalada Muqdisho, oo inta badan ay ka dhacaan dilal maalaayacni ah, labadan bilood ee ugu danbeysayna ay soo martay laba dagaal iyo isku dhacyo dad badan lagu laayay, qaarna lagu dhaawacay. Waxaan dhawaan ka dhacay fal Qisaas ah, oo deegaanka Barmuuda lagu fuliyay,

falkaas ma ahayn kii ugu horeeyay ee Muqdisho ka dhaca oo qisaas ah, laakiin wuxuu uga duwanaa kuwii uga horeeyay, in loo fuliyay qaab ay dad badani xamili waayeen, oo Tooreey meel banaan ah lagula dhacay gacan ku dhiiglaha, tasiba ha joogtee, waxaa dib kasoo baxay in qaabkii loo fuliyay qisaasta aanay u dhamayn sharici ahaan sidii Islaamku u dajiyay.

Haddii dil dhaco, waxaa iska caadi ah inay ka wada hadlaan, kana xaajoodaan labada dhinac (Reerka ciida wax dishay kasoo jeeda iyo reerka kale ee wax laga dilay), maxkamadda Maka Al-mukarama ee Qisaasta fuliysay nooc kastoo ay ahaataba wax dambi kuma laha in qisaas la fuliyo, waase ahddii ay shuruudihii u dhan yihiin.

waxay qisaastu ka dhacaysaa magaalo madaafiic la isku heysto oo maalin walba ciddii ladoono lagu dilo, iyadoo aanay jirin wax isku raacasho ama sharci xukuma, waxaa kasii daran, ma jiro nidaam iyo kala dambeyn, oo ma dhisna waxa loo yaqaan kala danbeynta sida maamul xaafad, degmo iyo gobol midna, mana jirto awood wax ka qaban karta haddii xad gudub ama falal dembi ah dhacaan.

Ninka la Qisaasay iyo kan wax qisaasay waxay kasoo wadda jeedaan beelaha aan hubeysneyn ee loo yaqaan, looma ooyaan, looma aaraanka, iyo hal heysyo kale oo dhammaantood muujinaya in aysan waxba ahayn sida ladoonana laga yeelanaayo, waxayna labada reer kasoo jeedaan beelaha {Shanta Caleemood iyo shiidle} waxayna beesha shanta caleemood oo gacan ku dhiiglaha ka soo jeeday ku andacootay in lagu degdegay qisaas ku fulinta wiilkooda, isla markaana ay balan lahaayeen qoyska ninka laga dilay, sidaas darteed; qisaastii dhacday dhawan waxay ahayd mid qalad ku jirto, haba ahaato sax in qofkii qof dila abaalkiisu yahay in isna la dilo.

Baaritaan iyo raad raac uu sameeyey shabakada Jiimonet, ayaa u suura gashay in xaalada dhabteeda wax ka ogaado, iyadoo dad la qaraabo ah ninka la qisaasay ay jiimonet u xaqiijiyeen in ayaga iyo reerka ninka laga dilay ay ku ballan sanaayeen in ay diyo kala qaataan, hayeeshee, ay maxkamada soo dadajisay falka Qisaasta, iyadoo xiliga la qisaasayay gacan ku dhiiglaha aysan goobtaasi joogin wax ehelkiisa ah, xitaa gabar isaga la dhalatay oo inta badan raashiin u keeni jirtay la xiray, iyadoo aan wax danbi ah haba yaraatee aan galin. Taasna waxay muujinaysaa in waxa ka socda Muqdisho oo dhami ay yihiin xaalad yaab leh, oo dadka miyirka qaba ugu filan in ay ku waashaan. Ma joogno xaalad aan khaladaad ku sixi karno, maxaa yeelay; waxaan ku nool nahay xaalad wax waliba qaldan yihiin, waxaase muhiim ah, oo wax haddii la helo loo aayi lahaa ah, in qofkii dembi galaa lagu qaado, dambigiisa.

Waxaan jeclaan lahayn, deblayda Afduubka, Dhaca, Kufsiga iyo dilalka har iyo habeen geeysata in Shareecada Islaamka la mariyo, waxaan ku farxi lahayn; kuwa dagaalada qarxiya ee maalin walba ummada dusheeda ku dagaalamaya, shacabkana gumaadaya laga jaasiyo dhibaataeda ay geysanayaan......Shareecada Islaamka dadka oo dhan waa u siman yihiin....Mise, xaalka waa in beelaha aan hubeysneyn sida ladoono laga yeesho, Beelaha Jareer Weynana qaab dhoola-tus ahaan mashruucyada qaarkood loogu fuliyo.

C/rashiid C/laahi Xeydar

www.jiimonet.com

Muqdisho Somalia

Xeydar1@hotmail.com