C/llaahi Yuusuf iyo Cali Geedi oo maalinta beri gaari doona Magaalada..

Madaxweynaha Dowladda Fderaalka C/llaahi Yuusuf Axmed iyo Ra’isul Wasaare Cali Max’ed Geedi  ayaa la filayaa in maalinta beri ah ay u ambabaxaan Magaalada Boosaaso halkaas oo ay ka furi doonaan xarunta ugu weyn ee lagu tababari doono ciidanka Booliiska Soomaaliyeed.

Xafladda furitaanka aya lagu soo beegay maalinta Ciidanka Booliiska Soomaaliyeed oo ku beegan 20-ka December, waxaana Magaalada Boosaaso haatan ku sii qulqulaya wufuud kala duwan oo ugu horeeyo Madaxweynaha maamul Gobaleedka Puntland Gen, Cadde Muuse iyo madax kale.

Xaruntaan oo ay maalgelisay hay’adda UNDP ayaa waxay noqoneysaa xarunta koowaad ee lagu tababaro ciidanka Booliiska Soomaaliyeed, iyadoo xarunta labaadna ay noqon doonto Magaalada kismaayo.

Madaxweynaha ayaa marka uu dhameysto safarkiisa Magaalada Boosaaso ayaa waxa uu u sii gudbi doonaan dalka Yemen oo kaga qaybgali doono shirka iskaashiga Sanca oo ay ka qaybgali doonaan wadamada Itoobiya, Suudaan, Yemen, iyadoo wadamada Soomaaliya iyo Jabuuti ay goob-joog ka noqon doonaan, balse waxaa la filayaa in kulankaan gebgaba-diisa ay ku biiri doonaan golahaasi.

Isbahaysiga Dooxadda Jubba oo beeniyay in ammandarro u baaqan doono shirka ..

Wararka naga soo gaaraya Magaalada Kismaayo waxay sheegaan in isbahaysiga Dooxadda Jubba u si kulul u beeniyay warar sheegayay in uu qarka u saran yahay in uu baaqdo shirka la isugu keenay xubnaha labada Gole ee ku kala sunga Muqdisho iyo Jowhar, waxa uuna isbahaysigu wararkaas ku tilmaamay kuwo aan sal iyo raad toona lahayn.

Bille C/llaahi Cabdi oo ah afhayeenka isbahaysiga Dooxadda Jubba ayaa waxa uu sheegay in isbahaysiga Dooxadda Jubba uu si weyn ugu diyaargaroobey soo dhaweynta xubnaha Dowladda isagoo sheegay in la dejin doono Hoteelada Mareediyaan iyo Tawakal, waxaa kalloo uu sheegay in xubnaha ku sugan Magaalada Muqdisho ay sameeyeen tanaasul aad u weyn kaddib markii ay sheegeen in ay aad u doonayaan in shirka gebi ahaantiisba lagu soo gebageeeyo Magaalada kismaayo, halka Kooxaha ku sugan Magaalada Jowhar uu Bille sheegay inay ka war sugayaan 48-ja saacadood ee nagu soo aadan. [Halkan ka akhi wararkii shalay ee Afhayeenka Isbahaysiga Dooxada Jubba]

Dhawaan ayaa qaar ka mid ah warbaahina waxay shaaciyeen in shirka lagu qaban doono Garoonka Diiyaaradaha ee Kismaayo sababo la xiriira dhinaca ammaanka.

Malaaqyo ka tirsan Beelaha Digil iyo Mirifle oo sheegay in dowlada ku xadgudubtey ..

Malaaqyo, Waxgarad, Nabadoono iyo Siyaasiyiin ka tirsan beelaha Digil iyo Mirifle ayaa eedeeyn u jeediyay Dowladda ku meel gaaarka ah eedeyntaas oo la xiriirta iyadoo Dowladda ku meel gaarka ah ka baxday heshiisyadii shirkii dib u heshiisiinta ee Magaalada Nairobi gaar ahaan qaabka qaybsiga jagooyinka Dowladda ee 4.5.

Waxay sheegeen xubna-haasi in Dowladda ku meel gaarka ah ay si gaar ah ugu xadgudubtay deegaanada beelaha Digil iyo Mirifle kaddib markii qaabka dib u dhiska ee Gobalada dalka ee deegaanada Bay iyo Bakool la raacsiiyay gobalo aysan si aad ah isugu dhoweyn, iyagoo arrintaasi ku eedeeyay wasiirka qorsheynta iyo iskaashiga C/risaaq Jurile.

Xubanhaasi waxay shee-geen in sarkiishii booliiska ee loo qaaday dalka Uganda aysan deegaanada Digil iyo Mirifle aysan waxba ka helin, sidoo kale magacaabista safaaradaha oo aysan iyana beelaha Mirifle waxba ka helin, taas oo ay sheegeen in ay ka soo horjeedo axdiga ku meel gaarka ah ee qaabka qaybsiga ee 4.5, sidoo kale Wasiir ku xigeenka iskaashatooyinka Yuusuf Max’ed Kheyr ayaa isna dowlada ku eedeeyay in ay faragelin ku sameysay dib u dhiska Gobalada Dalka, isagoo sheegay in Degmada Waajid aan wax shir ah lagu qaban karin, waxaa kalloo uu sheegay  in haddii Dowladda aysan si dhaqsi leh isku sixin in beelaha Digil iyo Mirifle ay kalsoonida kala laaban doonaan. 

Xubnaha labada Gole ee Muqdisho.oo sheegay in dhawaan la qaban doono..

Kulan balaaran oo ay isugu yimaadeen xubnaha labada Gole eek u sugan Magaalada Muqdisho ayaa waxaa shalay uu ka dhacay Hotel Saxafi ee Magaalada Muqdisho, waxaana kulankaasi looga arrinasanayay arrimo fara badan oo ay ugu horeyso maamul u sameynta gobalka Banaadir iyo arrimo kale. Guddiga loo xilsaaray maamul u sameynta gobalka Banaadir oo uu horkacayay Wasiirka ganacsiga Muuse Suudi Yalaxow ayaa waxa uu sheegay in ay soo gebagaboobeen xubnihii ka mid noqon lahaa Baarlamaanka gobalka banaadir.

xubnihii ka qaybgalay kulankaasi waxay isku raaceen in maalmaha soo socda xaflad balaaran loo sameeyo xubnaha ka mid noqday maamulka Gobalka Banaadir, waxaana loo saaray guddi isku dubarida xafladaas, waxaana guddigaas ka mid ah Jaamac Cali Jaamac, Max’ed Cabdi Xaashi iyo xubno kale.

Sidoo kale Guluhu waxa uusheegay in wakiilka Talyaaniga u qaabilsan arrimaha Soomaaliya uusan ahayn nin matali kara Dowladda Talyaaniga loona baahan yahay in Dowladda Talyaaniga ay si dhaqsi leh u bedesho.

WARARKII DEC 17, 2005 Hoos ka akhri

---

Madaxweyne C/llaahi Yuusuf Axmed berito  u ambabaxaya wadanka ..

            Madaxweynaha Dowladda Federaalka C/llalahi Yuusuf Axmed ayaa lagu wadaa in maalinta beri ah uu u amababaxo dalka Yemen halkaas oo uu ka dhici doono shirka saddex geesoodka ah oo ay isugu imaan doonaan wadamada Yemen, Suudaan iyo Itoobiya, kaas oo looga hadli doono sida uu wadamadaas iskaashi u dhex karo.

            Shirkaan ayaa waxa uu ka duwan yahay shirarkii hore waxaana sanadkaan ka qaybgalaya Madaxweynaha Wadanka Jabuuti Ismaaciil Cumar Geele iyo Madaxweyne C/llaahi Yuusuf Axmed, iyadoo Shirkaani lagu wado in lagu heshiisiiyo Madaxweynaha wadanka Jabuuti Ismaaciil Cumar Geele iyo Ra’isul Wasaaraha wadanka Itoobiya Milles Ziniwani oo mudooyinkaan khilaaf u dhexeeyay.

            Kulanka dib u heshiisiinta ah marka uu dhaco ayaa wadamada Soomaaliya iyo Jabuuti waxaa u furan in ay ka mid noqdaan iskaashiga u dhexeeyay wadamada Yemen, Itoobiya iyo Suudaan.

            Soomaaliya waa markii ugu horeysay oo ay ka qaybagasho, iyadoo kal hore uu Madaxweynaha Dowladda Federaalka C/llaahi Yuusuf Axmed uu qoraal u diray wadamadaas si uu dalkiisa uga mid noqdo Golaha Iskaashiga ee yemen, Itoobiya iyo Suudaan.  

Waxgarad ka tirsan Beesha Hillibi Dallandoole oo u soo jeediyey Beesha Mudulood.

            Kulan ay isugu yimaadeen Waxgaradka, Culuma’u-diinka, Dhallinyarada Beesha Hillibi Dallandoole, ayaa kulankaas looga hadlay saddex nin oo ku xiran xabsiga Magaalada Balcad ee Gobalka Sh/dhexe, kuwaas oo la sheegay in halkaasi ay ku xiran yihiin muddo toban cisho ah.

            Waxgaradka Beesha waxa ay xarigaasi ku tilmaameen mid gardaro ah oo aan geed loogu soo gamaban, waxayna ka dalbadeen maamulka halkaasi ka taliya ee Muuse Suudi in ay si shuruud la’aan ah ku sii daayaan saddexdaa nin oo uu ku jira nin Nabadoon ah oo lagu magacaabo Xasan Shoobaaye Maxamuud, sidoo kale waxay Beesha Hillibi Dallandoole ugu baaqeen Waxgaradka, Culuma’u-diinka, iyo Nabadoona-da beesha Mudulood in ay gacan ka gaystaan sidii lagu soo diin lahaa raggaasi ku xiran Magaalada Balcad, sidoo kale waxay ugu baaqeen hay’adda Xaquuqda Aadanaha in ay iyana gacan ka gaystaan sidii lagu siideyn lahaa saddexdaa nin oo muddo halkaasi lagu haysto.

            Ugu dambeyntii waxa ay sheegeen waxgaradkaasi in haddii aan si shuruud la’aan ah lagu siideyn saddexaa nin in wxii ka yimaada ay dusha u ridan doonaa maamulka halkaasi ka taliya ee uu madaxda u yahay Muuse Suudi, waxaana warkaani na soo gaarsiiyay Max’ed Xasan Ibraahim (Stilla) oo ah guddoomiyaha ururka Dhallinyarada beesha Hillibi Dallandoole, Nabadoon Cali Caddaawe Xasan iyo Nabadoon Cumar Qaasim.

Shirkii Daraasaadka Gobalada oo lagu Go’aamiyey in Magaalada W aajid ay martigeliso..

            Waxaa maalintii khamiista hayad Magaalada Jowhar lagu soo gebgabeeyay shirkii daraasaadka dib u dhiska Gobalada dalka, waxaana ka qayb-qaadanayay inta badan Gobalada dalka iyo khuboro ka socotay wadamada daneeya arrimahaya Soomaaliya, iyo kuwa deeqaha bixiya.

            Shirkaan oo socday muddo afar maalmood ah ayaa xiritaankiisii waxaa soo gebgabeeyay Ra’isul Wasaare Cali Max’ed Geedi oo sheegay in loo baahan yahay in Gobalada ay si dhaqsi leh u soo gudbiyaan qaabka ugu haboon ee dib u dhis looga sameeyn karo gobalada ay ka yimaadeen, isagoo sheegay in Dowladdu ay siin doonto wixii qarashaad ah ee loo baahan yahay.

            Muran ayaa waxa uu ka dhashay cidda martagelineysa kulanka xiga, waxaana u tartamay Degmada Waajid ee Gobalka Bakool iyo Degmada Marka ee Gobalka Sh/hoose, hase yeeshee waxaa markii dameb tanaasul sameeyay xubnihii ka socday Degmada Marka, waxaana shirkaan shirkiisa xiga lagu qaban doonaa Magaalada Waajid, halka kan afraadna lagu qaban doono Magaalada Marka.

            Haddaba su’aasha is weydiinta mudan waxay tahay shirkii ka dhacay Nairobi iyo kii ka dhacay Magaalada Jowhar iyo kuwa soo socdaba waxaa ku bixi kara Kumanaan Kun oo Doolar taas oo aan dhihi karno waxaa lagu maalgelin karaa ama dib loogu dhisi karaa dhowr Gobal, waxayna dadka qaarkood shirkaan u arkaan shir lagu luggoynayo ummadda Soomaaliyeed oo aan waxba loogu qaban doonin.   

W/D Amiin Yuusuf Khasaaro

Email amiinkhasaaro@hotmail.com