---

Dowladda Shiinaha oo daboolka ka qaadey in ay Safaarad ka furaneyso...

Waxaa maalintii shalay ahayd degmada Jowhar soo gaaray wafdi ka socday Wadanka Shiinaha oo uu hogaaminayay Sariifka Shiinaha u fadhiya wadanka Kenya, waxaana Garoonka Diyaaradaha ku soo dhaweeyay wasiiro ka tirsan Dowladda Federaalka.

            Wafdiga ayaa markiiba waxay kulan la yeesheen Ra’isul Wasaare Cali Max’ed Geedi oo ay isla soo qaadeen xiriirka iskaashi ee u dhexeeya Soomaaliya iyo Shiinaha, iyadoo Ra’isul Wasaare Cali Max’ed Geedi uu sheegay in Dowladda Shiinaha ay ka mid tahay Dowladdaha in badan gacan siiyay Shacabka Soomaaliyeed waxqabadkooduna uu weli muuqdo.

            Safiirka oo ka hadlay kulankaasi ayaa waxa uu sheegay in Dowladda Shiinaha ay aad u daneyneyso in sii xoojiso xiriirka Soo jireenka ah ee u dhexeeyay labada shacab ee Shiinaha iyo Soomaaliya, waxa uuna halkaasi ka caddeeyay in maalmaha soo socda ay safaarad ka furan doonaan Magaalada Jowhar.

            Dhawaan ayaa Dowladda Talyaaniga waxay shaaca ka qaaday in iyana ay safaarad rasmi ah ka furan doonto Magaalada Jowahr, sidoo kalan waxaa horey safaarad uga furtay Jaamacadda Carabta iyo Midowga Afrika.

Maanta oo ku beegan sanadguuradii koowaad Badgariirkii Tsunami..

Maantoo kale ayay ahayd markii uu bad gariir dabaylo wata ay ka dhaceen Gobalo ka tirsan Wadamo ku yaala Qaradda Eeshiya gaar ahaan kuwa ku teedsan Badweynta Hindiya, waxaana bad-gariirkaasi ku geeryooday Nus Milyan qof, waxaana ku guryo belay malaayiin qof oo kale.

Musiibadaan oo loogu magacdaray Tsunami ayaa waxay dhacday 26/12/2004, wuxuuna bad-gariirkaan ahaa kii ugu xumaa ee dhaca inta la og yahay adduunka, iyadoo ay weli muuqdaan raadadkii uu reebay bad-gariirkaasi, sidoo kale waxa uu baabi’iyay Magaalooyin fara badan oo ku yaala Qaaradda Aasiya.

Bad-gariirkaan ayaa waxa uu xitaa saameeyay Soomaaliya gaar ahaan deegaanka Xaafuun oo ay ku dhinteen dhowr qof ayna ku guryo beeleen dad aad u fara badan, iyadoo sidoo kale Badda ay la tagtay kalluumeysato iyo Doonyo ay wateen.

Meelihii uu dhul gariirku horey ka dhacay ayaa xalay iyo saakayba ka qaxayay dad aad u fara badan iyagoo ka fogaanayay goobaha ay Baddu ku dhowdahay, waxaana Maanta goobihii uu ka dhacay bad-gariirkaasi ay isugu soo bixi donaan Kumanaan kun oo dad ah oo tacsi u dhigi doona dadkii ku geeryooday bad-gariirkaasi, iyadoo sanadkii hore Bad-gariirku uu ku soo beegmay xili Dadka Kirishtaanka ahi ay ku xusayeen Ciidda Kirismiska, waxaana xeebaha isugu soo baxay dad aad u fara badan oo iyagu intooda badan ku dhintay bad-gariirkaasi.

Khubarada saadaasha dabaysha ama Dhul-gariirada ayaa waxa ay sheegeen in ay dhici karto in ay dabaylo kale ay dhacaan, waxayna uga digeen dadka in ay ku dhowaadaan dhulka xeebaha.

Qarax uu dad ku dhintay oo ka dhacay.Muqdisho..

Maalintii shalay ahayd ayaa qarax aan la garaneyn halka uu ka yimid waxa uu ka dhacay agagaarka Warshadda hore ee Caanaha, waxaana qaraxaasi ku geeryooday ilaa iyo 6 ruux oo saddex ka mid ah ay ahaayeen Carruur oo markaasi ka yimid Iskuul, waxaana ku dhaawacmay ilaa iyo a16 qofood.

Goobta uu ka dhacay qaraxu ayaa ahayd goob ay ka dhisan yihin Guryo Jiingado ah, isagoo baabi’iyay guryo fara badan, ilaa iyo hadda lama sifeyn nooca uu ahaa qaraxahaasi, balse warar ayaa waxay sheegayaan in uu ahaa Qoriga noociisu yahay 120MM oo ah Hoobiye, warar kale ayaa waxay sheegayaan in qaraxaasi uu ahaa Bambo goobtaasi la soo dhigay, sidoo kale dad kale ayaa waxay sheegeen in uu ahaa Miinada dhulka.

Saraakiil ku xeel dheer arrimaha qaraxyada noocaan oo kale ah ayaa waxa ay sheegeen in uu yahay Qori meel fog laga soo riday oo ah Hoobiye, wuxuuna qaraxaani ku soo beegmay xili dagaalo ay ka soconayeen Magaalada Muqdisho oo la isku adeegsaday Hubka noocyadiisa kala duwan, dagaaladaasi waxay istaageen shalay subaxdii intii uusan dhici qaraxaan.   

 

W/D Amiin Yuusuf Khasaaro
Email amiinkhasaaro@hotmail.com

---

Maxakamadaynta 9 qof oo ku eedeysan dilki marxuun guraage oo baaqatay 

Waxaa Axadii Dec 25 dib u dhac ku yimid oo aanan qabsoomin maxakamadeynta sagaal qof oo ku eedeysan dilkii sargaalkii ka tirsanaa qaramada midoobey ee lagu magacaabi jiray  guraage ee dhawaan lagu dilay magalada kismayo ayadoo baaqashada maxakamadeyntan ay sabab u tahay habacsanaan soo kala dhex gashay maamulka iyo xeer ilaaliye yaasha maxakamad magaalada kismayo . 

Xeer ilaaliyah guud ee maxakamada magaalada kismayo jaamac warsame ayaa waxaa uu saxaafada u sheegay in baaqashada maxakamad soo taagida ragaan eedeysanayaasha ay sababtay ayadoo aanan loo soo gudbin dacwada ragaasi waxaana u intaasi ku daray xeer ilaaliyaha maxakamada kismayo in hadii la soo dhameyestiri lahaa dacwada ragaan eedeysanayaasha ah ay Axad Dec 25 qabsoomi laheyd dacwad qaadista ragan. 

Sagaalkan qof ee ay ka baaqatay maxakamad soo taagida ee loo hayesto in ay wax ka maleegeen falkii argagaxa badnaa ee loo gayestay sargaal dhinaca amaanka ee gobolada jubbooyinka ugu qaabilsanaa heyada qaramada midoobey ee UNDP ayaa waxa ay yahiin kuwo ay xabsi ku heyntoodu ay sababtay in khilaaf weyn soo kala dheh galo madaxda sar sare ee maamulka isbahaysiga dooxada jubba waxana haatan la filayaa in uu dhamaado khilaafka maamulka isbahaysiga kala dhaxeeya Col. cabdi cigaal oo ay isku hayb yahiin qaar ka mid ah ragaan ku eedeysan in ay dilka marxuun guraage wax ka ogaayeen  ayadoo maxakamad soo taagida ragaan ay baaqaneyso markii afaraad . 

Ma ahan markii ugu horeysey oo ay baaqato ama uu dib u dhac ku yimaado maxakamad soo taagida dad eedeysanayaal ah oo ku xir xiran xabsiyada maamulka isbahaysgia doxada juba ayadoo taas loo eedeynayo wada shaqeyn la aanta dhex taala maamulka kismayo ka arimiya iyo xeer ilaaliye yaasha maxakamada magaalada kismayo

cabdi khadar Nuur
cabdiqadar84@hotmail.com

Faafin: SomaliTalk.com | Dec 26, 2005

War saxaafadeed ku wajahan dagaalada ka dhacaya waqooyiga Muqdisho

Ururka dhalinyarada Mudulood ee wadanka Denmarka ayaa ugu baaqay dhinacyada ku dagaalamaya magaalada Muqdisho in dagaalka ay ku joojiyaan si shuruud la'aan ah, isla markaana ay heshiis gaaraan

Kulan aan caadi aheyn oo ay isugu yimaadeen dhalinyardaasi oo ku dhaqan Scandinevianka gaar ahaan magaalada Arhus ee wadanka Denmarka ayaa waxa ay baaq nabadeed u jeediyeen beelaha walaalaha ah ee ku dagaalamaya W/magaalada Muqdisho, iyagoo ugu baaqay in si shuruud la'aan ah ay xabadda u joojiyaan.

Kulkankaas oo ahaa mid deg deg ah ayaa waxa ay sheegeen xaaladda ka jirta Boondheere iyo degaanada ku xeeran ay tahay mid cakiran loona baahan yahay in odayaasha dhaqanka, culuma udiinka iyo waxgaradka ay si deg deg ah u dhameeyaan khilaafaadka soo jiitamayay mudada dheer oo sababay dhimasho iyo dhaawac dad rayid ah.

ururka mideynta dhalinyarada beesha mudulood ee Scandinevianka waxa uu xusuusinayaa walaalaha dagaalamaya in dagaalka wax faa'iido ah aanu u laheyn shacabka Soomaaliyeed oo xabadu ay daashatay mudo 15 sano ah.

Nuqul ka mid ah qoraal saxaafadeed ururka dhalinyarada beesha Mudulood uu soo gaarsiiyay xafiiska Shabelle ee magaalada Arhus ayaa waxaa ugu dambeyntii loogu baaqay dhinacyada dagaalamaya in dagaalka ay joojiyaan.

waxaana ku saxiixnaa Nuqulkaasi Gudoomiyaha Ururuka Mideynta Dhalinyarada Mudulood
Daa'uud Xuseen iyo ku xigeenkiisa Cabdulaahi Cali abdullahi66@hotmail.com  telefoon 004586216998

Xuseen Madoobe xuska@hotmail.com  ama
Denmark