GABAY CARTAN!

Abwaanku wuxuu cabirayaa jahliga haysta Soomaalida iyo sida ay u tuugsadaan, u baryootamaan shaxaadkana ugu nool yihiin iyo sida kii shaqaysanayey ay u takoorayaan shaqada uu bulshada u hayo awgeed. Wuxuu tusaaleynayaa in hawshan bulshadan lagu takooray ay tahay ta ay wadamada ay maanta u cararayaan ay ka qabtaan iyagoo horey u marinaya dhaqaalaha wadamo aysan lahayn. Ma lagu qaadaa oo ma lugu geeyaa Yurub iyo Ameerika? Maxaad sheeganaysaa oo lagu gaarsiiyey? Maxaa layeelay reerihiina?
Ajigii uu wadnuhu go’I jirey marka uu maqlo magacii Midgaan ayaaba maanta ku xoogsanaya! Yaab badanaa!

Wuxuu yidhi Abwaanku:

Carigeena oo idil dagaal caama lagu qaadye
La cadaadiyoo reer kastaba wuu cadibayaaye
Sida cawsha oo kale ayaa laysu celiyaaye
Markay caalamkii wada arkeen ciida lagu aasay
Ee lagu casumee Yoroob cagaha loo saaray
Ciilkaa kuwii baday Midgaha ee cunayay jiidhkooda
Cudud bay ku qaateen halkay calaf u doonteene 

Soomaali baa caam ahaan saartay cududeede
Cuqubooyin baa laga galoo loo cadiig sadaye
Maantana cidlaa loo baxshoo ciriqii loo laabye
Carruur iyo ciroolaba dhamaan way cartamayaane
Cidla jiif intay wada yihiin caabuq baa jira-e 

Irirkii kolkaan faaliyeen caawa kor u eegay
Kol hadday cadaaladi luntoo qolo ciyaarayso
Boqortooyo caynkeed haddii ciida lagu qaybshay
Cadkii ay lahaayeen hadduu reer kastaba cunay dhamaantiiba
Caynkaa intaad nagu tihiin cidhib xumaantiina
Inaad horumar caadiya heshaan waa cad soo go’aye

 Allahayoow Coloowaa sidaa loo cadibay maanta
Sida caam ahaan loo tashaday ee laysu celinaayo
Caraday lahaayeen sidaa looga celinaayo
Carruur iyo ciroolaba sidaa cunaha loo taabay
Cilmigaaga weeyaan waxaa caawa guud sudhane
Qof cadaab mutaystaad janada caadi gelisaa-e
Ciqaabtani Allow naga dul qaad caadil baa tahaye 

Waxaa tiriyey Abwaan CigeYusuf Ibraahim abdi_duse@yahoo.fr